Etter planen skulle den internasjonale finalen i Melodi Grand Prix gått av stabelen på Telenor Arena i Bærum 29. mai 2010. No blir finalen utsett på ubestemt tid. Dei ansvarlige synest ikkje dette er ei stor sak.
-Dette er heilt udramatisk, seier ei kjelde hos arrangøren. -Det er berre snakk om ei utsetting av tekniske årsaker.
Det har heile tida vore garantert at finalen skal haldast 29. mai. Denne datoen står i annonsar og tv-program over heile Europa. Arrangøren har ikkje berre garantert at finalen skal gå denne dagen. Dei har også lova ein historisk god finale. Under eit julebord i NRK i fjor, skal ein av dei ansvarlige ha sagt i ein tale: Den internasjonale finalen i Melodi Grand Prix skal bli vår månelanding!
Likevel avviser arrangøren at det er snakk om eit løftebrot.
-Det er veldig vanskelig å arrangere Grand Prix-finale. Noko så stort som dette har aldri tidligare blitt arrangert i ei bygd som Bærum. Når ein skal gjere noko som aldri har vore gjort før, er det viktig å ta den tida ein treng.
I månelandings-talen blei det ikkje berre lova ein historisk god internasjonal finale, det blei også lova at denne finalen skulle bli den hyggeligaste og mest miljøvennlige finalen i Grand Prix-historia. Det blei garantert ein utsleppsfri finale nesten utan straumbruk, og gratis frukt til alle frammøtte.
-Det var noko vi berre sa. Vi har ein del SV-arar som jobbar her. Dei liker å høyre sånt.
Arrangørane seier at dei framleis har ambisjonar om ein spesielt miljøvennlig og hyggelig finale, men at det altså tek meir tid enn planlagt, av tekniske årsaker.
-Det er mange ting som har vist seg å vere meir tidkrevjande enn vi hadde trudd. For eksempel skal Aserbajdsjan ha fem dansarar i bar overkropp på scena. Samtidig. Det er mykje ekstra hud som skal sminkast. Dessutan skal svært mange ha vindmaskiner for at det skal sjå ut som om dei syng i motvind. Eit historisk stort tal på vindmaskinar vil vere i bruk samtidig. Det er mykje som skal koordinerast. Dette er litt av eit løft.
en viktigaste grunnen til utsettinga er likevel at arrangøren oppdaga at det skal vere to semifinalar i tillegg til finalen.
-Det seier seg sjølv at det blir mykje vanskeligare. Tre gonger så vanskelig, faktisk.
Likevel avviser altså arrangøren at utsettinga er eit nederlag.
- Absutt ikkje. Ambisjonane våre er like store som dei alltid har vore. Ingen løfte er brotne. Ingenting er forandra. Det som er aller viktigast å understreke er dette: Det blir Eurovision 2010 på Telenor Arena, og det blir ein historisk bra finale. Det blir berre ikkje i 2010.
-Når blir det?
-Det er vanskelig å seie. Vi håper å komme i gang med prøver i 2014. Då vil vi kanskje vere klare med sjølve finalen i 2018.
-Kan de då garantere ein utsleppsfri finale med gratis frukt til alle?
-Det kan vi godt. Og sidan dette er såpass lenge til, så vi kan også godt garantere at alle vindmaskinene skal byttast ut med vindmøller.
Publisert: 08.05.2010
Skrivarvennleg versjon
Kommentarar [5]
Legg til bokmerke
Tips ein venn